17. juuni 2015-imi Nuna tamakkerlugu naatsorsuutit eqqortut 2015-imi ukiumoortumik paasissutissaniittut saqqummersinneqarput
2013-imi aningaasarsiornikkut appariaat 1,9 pct.-iusimavoq
Kisitseqqinnerit takutippaat 2013-imi akit qaffakkiartornerat ilanngaatigereerlugu tunisassiornerup nalinga (BNP) 1,9 pct.-imik appariarsimasoq. Kalaallit Nunaata aningaasarsiornera taamaalilluni ukiuni marlunni malittuinnarni annikilleriarpoq, kisitsigallarnerit 2012-imut tunngasut takutimmassuttaaq tunisassiornerup nalinga aammattaaq 0,3 pct.-imik annikilleriarsimasoq. 2013-imi aningaasarsiornerup annikilleriarneranut peqqutaanerpaavoq sanaartornermik tunisassiallit annertuumik kinguariarsimanerat.
Titartagaq 1.1. Tunisassiornerup nalinga (BNP), akit qaffakkiartornerat peereerlugu
Malugiuk: 2003-2011-mi kisitsisit inaarutaasuupput, 2012-2013-mili kisitsigallarnerullutik.
Najoqqutaq: Naatsorsueqqissaartarfik, http://bank.stat.gl/nrn10
Nuna tamakkerlugu naatsorsuutini ingerlatsiviit atorfeqarfiillu branchenut pingaarnernut 32-nut agguataagaapput. Tunisassiornerup tamakkiisup taakkununnga branchenut agguataarnerata pisinnaalersippaa inuussutissarsiutit sannaanik misissueqqissaarsinnaalerneq. Branchet 32-iusut paasiuminarsarnerisigut ikinnerulersillugit titartagaq 1.2-mi saqqummiunneqarput.
Inuussutissarsiorfik Pisortat inuinnaallu kiffartuussinerat inuussutissarsiutini annerpaatut inissisimavoq, inuiaqatigiinnilu tunisassiornerup tamakkiisup 34 pct.-ianik pilersitsiffiulluni. Inuussutissarsiutip imarivai pisortat kiffartuussinerat allaffissornikkut, peqqinnissaqarfeqarnikkut, ilinniartitaannermik ingerlatsinikkut il. il. Assartuineq, post aamma tele tunisassiornerup tamakkiisup iluani 17 pct.-imik pilersitsiffiuvoq. Aalisarneq, piniarneq aammalu Industri katillutik tunisassiornerup 12 pct.-erluinnaa pilersippaat. Tassani malugineqassaaq fabrikkit aalisakkanik qalerualinnillu suliarinnittartut Industrimi ilaatinneqarmata.
Titartagaq 1.2. Inuussutissarsiutit naleqarnerulersitsinerisa agguataarnera 2013, akit aalajangersimasut 2005-imeersut atorlugit
Najoqqutaq: Naatsorsueqqissaartarfik, http://bank.stat.gl/nrn04
Titartagaq 1.3-mi takuneqarsinnaavoq naleqarnerulersitsisarnermik pilersitsisarneq qanoq inuussutissarsiutinut agguataartarnersoq. Tunisassiorneq (tungujortut), kiffartuussiviit (qorsuit) taavalu pisortat inuinnaallu kiffartuussinerat (qasertoq).
Titartagaq 1.3. Naleqarnerulersitsinerup ineriartornera, akit aalajangersimasut 2005-imeersut atorlugit
Malugiuk: 2003-2011-mi kisitsisit inaarutaasuupput, 2012-2013-mili kisitsigallarnerullutik.
Najoqqutaq: Naatsorsueqqissaartarfik, http://bank.stat.gl/nrn04